Umuryango Mpuzamahanga wita ku Buzima (OMS) watangaje ko ibikorwa byo guhashya icyorezo cya Ebola mu gace ka Beni muri Repubulika Iharanira Demokarasi ya Congo (RDC) byasubukuwe, ibi bibaye nyuma y’aho ku wa Gatandatu w’icyumweru gishize Minisiteri y’Ubuzima muri iki gihugu yatangaje ko ibyo bikorwa byabaye bihagaritswe nyuma y’imirwano yabereye hafi y’Ikigo gitegurirwamo ibikorwa by’ubutabazi ku ndwara ya ebola.
Umuyobozi Mukuru wa OMS, Tedros Adhanom Ghebreyesus, kuri iki Cyumweru yashimangiye ko ibikorwa byo guhashya Ebola bigiye gusubukurwa, cyakora yavuze ko abakorerabushake bari muri ibyo bikorwa umutekano wabo utifashe neza kubera inyeshyamba nk’uko VOA yabitangaje.
Iyo mirwano yari yatumye ibikorwa byo guhashya ebola bisubikwa yahuje ingabo za Loni ziri mu butumwa bw’amahoro muri RDC (Monusco) n’umutwe w’inyeshyamba za ADF urwanira mu Burasirazuba bwa Congo, dore ko zimaze kwica amagana y’abaturage kuva mu mwaka wa 2014 muri ako gace, mu Cyumweru gishize zishe abasirikare ba Monusco barindwi.
Twabibutsa ko kuva muri Kanama uyu mwaka wa 2018, Ebola imaze guhitana abantu 213 mu Burasirazuba bwa Repubulika Iharanira Demokarasi ya Congo.
TETA Sandra
